مراجعة فيلم جواب اعتقال بطولة محمد رمضان

فيلم جواب اعتقال ، فيلم بصبغة سياسية عبيطه 

قصة الفيلم :

خالد الدوجرى الشاب الذي يحمل عقدة نفسيه بسبب وضع أباه الاجتماعي والذي دفعه بعد ذلك لأخذ الدين كوسيلة لتحقيق أهدافه ورغباته ، فأصبح قائد الجناح العسكرى لما يسُمى تنظيم الاخوة ..

ومع حدوث أخر عمليات للجناح العسكرى فى تدمير كمين وقسم للشرطة يقوم جهاز الداخليه بتولية ضابط مصرى فى جهاز أمن الدوله - الهيقوم بدوره الممثل إياد نصار - بالقبض على خالد الدوجرى وباقي أعضاء التنظيم ، ومع نفس الوقت يصُارع خالد فى الفوز بقلب ابنة عمه الذي لم يعشق غيرها ، وفي الصراع مع اخوه الاصغر الذي يحاول خالد دائما حمايته وابعاده عن التنظيم وعن أفكاره حتى لا ينضم للجانب المسُلح للتنظيم خوفاً عليه ..

البوستر الرسمى لفيلم جواب اعتقال

التمثيل :

شوفنا مع بعض قصة الفيلم ، وازاى قصة كويسه زى دى ممكن يطلع منها فيلم كويس جداً ، بس للاسف المُخرج ماقدرش يستغل القصة ولا حتى الممثلين .. لأن هدفهم من الفيلم ماكنش هدف سينمائي او انهم يعملو منُتج سينمائى كويس .. وإنما كان هدفهم سياسي بحت … كأن لسان الحال يقول انهم بيحاول يستغلو شهُره محمد رمضان فى نشر سياسات معُينه ..

الشخصيات الموجوده فى الفيلم ، المفروض انها شخصيات تقيله زى محمد رمضان وإياد نصر حتى دينا الشربينى العملت دور كويس فى فيلم زى هيبتا ، الممثلين تحس انهما مقُيدين ، مش عارفين يمثلو اصلاً ..

محمد رمضان

تمثيله كان بارد جداً فى الفيلم ، تحس انه مش بيمثل من قلبه :D .. فى طريقه معُينه محمد رمضان بيتكلم بيها دائما فى فيديوهاته البيرفعها ع الفيس وفى برامجه .. طريقة بارده والصوت كله رتم واحد … هيا دى بقى نفس الطريقة الـ محمد رمضان بيمثل بيها .. التمثيل مكانش طبيعى ابداً .. الا فى بعض المواقف كان تمثيله فيها جميل الى حد ما … انما باقى الفيلم كأنه يقرأ جرنال او مُجرد بيقول سكربت وخلاص

دينا الشربينى

طول الفيلم عماله تصرخ وتصوت " مبحبكش مبحبكش ، ابعد عنى " … البنت والله ممكن يطلع منها شغل حلو بس هيا محبوسه يعنى فى سيناريو غبي ..

إياد نصر

بصراحه تمثيله حلو وعلى الرغم ان السيناريو مش مديه مساحه فى انه يطلع الابداع بس كان بيحاول ، بس ليه طلعات غريبه بتفلت منه .. زى مثلاً فيلم 18 يوم فى اللقطة الزعق فيها وقال " هقلبك مومس بالدور " .. طلع فيها طلعه غريبه وتحس ان اللهجه بتفلت منه - بدال ما بتعرفش تزعق ماتزعقش -

صبرى عبد المنعم

ممثل كويس وتقيل .. بس للاسف مكنش بيعمل حاجه فى الفيلم برضه غير انه بيقنع بنته انها تتجوز خالد الدجوى بنابع الخوف منه ..

سيد رجب وصبري فواز

لو فى تمثيل فى الفيلم نقدر نقول عليه كويس فهو تمثيل الاتنين دول .. والساعدهم فى كده ان السيناريو بتاعهم كان كويس الى حد ما وان هما اصلا ممثلين كويسين وليهم كاريزما خاصه بيهم .. بمعنى انهما فى اى سيناريو او فيلم هيعرفو يبدعو

السيناريو والحوار

بصراحه حاجه  " ماسخه " .. السيناريو ده ماكنش سيناريو فني انما كان مُجرد اسكربت مكتوب من امن الدولة ، تحس ان السيناريت كان ظابط فى الأمن الوطنى .. السيناريو مُكتوب بنفس الطريقة البيكتب فى اسكربتات الاعلام المصرى … الاخوان وحشين ، الاخوان هما السبب فى أزمة الدولار ، الاخوان بيدعو قصة الاختفاء القصرى .. الاخوان الاخوان الاخوان .. مفيش أى حيادية فى الفيلم ، وما نقدرش نقول ان الفيلم بيقدم قضيه او بيناقش قضيه .. إنما الفيلم كانه كان مُجرد حلقة من برنامج لميس الحديدى ، يعنى لو كانو جابو لميس الحديدى كان هيطلع نفس الناتج تقريباً

بالنسبة للموسيقى فهيا مسروقة من فيلم " فان " للمثل شاروخان فمش محتجاين نتكلم فيها كتير ..

بالنسبة للإخراج والتصوير

الفيلم كان ممكن يطلع منه حاجه كويسه بس للاسف لقطات الاكشن كانت متكروته وتحس ان محمد رمضان بيضرب نار وبعد فتره بيطلع الضوء … مش عارف بس فى حاجه غلط .. لما شوفت لقطات الاكشن فى الفيلم أفتكرت علطول لقطات قتال الكونج فو  فى فى فيلم الحاسه السابعه مش عارف ليه  :D

تقيم جود افلام للفيلم 5 من 10
تقيم 4.9/10 · IMDb