مراجعة فيلم Hotel Mumbai
الفيلم بيتكلم عن قصة حقيقية وهى أحداث الهجمات الارهابية الحصلت فى مومباى سنة 2008 وركز الفيلم بشكل كامل يعتبر على الحدث الاكبر فى سلسلة الهجمات دى ومرحلتها الاخيرة والأكبر وهى حصار فندق تاج محل وقتل حوالى 195 شخص ، العجيب إن عدد الإرهابين المسحلين برشاشات وقنابل يدويه 10 اشخاص ودول الهجمو على مدينة مومباى كلهم وتقريبا كان نصهم أو أقل هجمو على فندق تاج محل ، كانو بيقتلو اى حد تقريباً بيقابلهم ومش بيفرقو مابين راجل او ست ، لما تشوف الفيلم وتشوف طريقة قتلهم تحس إنك بتتفرج على حد بيلعب لعبة قتالية بعبثية بدون حتى أى تنظيم ، وده الـ تم توضحيه فى الفيلم وتم رسمه بشكل جيد عشان يوصل للمشاهد كمية اللامبالاه والدم البارد الكان عند الناس دى وده نتيجة للعقائد الكان بتتشرب ليهم فى معسكرات التدريب على إن الناس دى كفره والمفروض تموت ومايستحقوش الحياء ، وإنهم كالماشيه أو اقل ..
والفيلم ركز بشكل كبير على مساعدة وإنقاذ طاقم الفندق لنزلاء الفندق ، وتم تجسيد ده عن طريق Arjun اليعُتبر البطل الاساسى للفيلم ، وهو عامل بسيط فى الفندق من أسرة متواضعة والكان ليه دور كبير فى إنقاذ النزلاء .. والفيلم بيبتدى وينتهى عند صورة Arjun مره وهو بيستعد بشكل سريع إنه يلحق الشغل ووشه مرسومة عليها مشاعر الخوف وقلة الحيله من التاخير عن شغله وعن بنته المحتاج يوديها لمراته فى شغلها وعن جذمة الشغل النسيها ومش عارف مكانها فين فاضطر يروح الشغل من غيرها ، وينتهى ووشه مرسومه عليه مشاعر الراحة والسعادة لأنه رجع لبيته ومراته وبنته بعد يوم طويل من فقدان الأمل والموت كل لحظة والتوتر ..
الإخراج جيد جداً والفيلم بيلعب بشكل كبير على كتم الانفاس والسرعة فى الأحداث البتخليك مش قادر تشيل عينك عن الشاشة والاحداث الحقيقة وسيرها ساعد المخرج بشكل كبير على ده لإن الحصل فى مومباى وقتها كان غير طبيعى بصراحة ، أصل مش طبيعى اتنين ماشين برشاشات فى الشارع وعربية بوليس فيها اربع رجال شرطة مسلحين فيخلصو عليهم وهما كأنهم بياكلو لبان بعد كده يطلعو يركبو عربية الشرطه ويمشو بيها يقتلو اى حد يقابله بدون تفرقه راجل ست كبير شاب الخ ..
التصوير رائع بصراحة والتمثيل أروع والخلطتين وده البيتحسد فى اى سكرين شوت تحب تاخدها للفيلم ، هيبان فيها كمية تمثيل وتجسيد بشكل كبير غير اللمسة الفنية للصورة نفسها ..
الفيلم رائع بشكل كبير ..
ليست هناك تعليقات:
إرسال تعليق