مراجعة فيلم The Theory of Everything

“كلنا مختلفون
ومهما بدت الحياة سيئة
هناك دائما شيء يمكنك فعله والنجاح فيه
طالما هناك حياة فهناك أمل”
(ستيفن هوبكنج)

الامل.. ما هو الأمل
هو ان تفقد كل شيء في الحياة لكن تظل محتفظا بايمانك بنفسك حتى وان أفقدتك الفيزياء ايمانك بالإله
الامل هو ستيفين هوكينج
الذي يؤمن ان الارض كروية لا توجد حافة لها
لذلك فالبحث عن حافة اى شيء في الكون لا جدوى منه

اولا الفيلم حلو وممتع وفيه جرعة تحدي وامل لكل شيء في الكون . أمل في الحب والحياة والعلم والفن
اداء ايدي ريدماين اداء اوسكاري رائع ونفس النظام اداء فيليستي جونز
الموسيقى التصويرية كانت ملخصة كل شيء ومعبرة عن كل شيء بشكل رائع جدا وان كانت الموسيقى جرعتها زادت بشكل مبالغ فيه ودي برضو من السمات الهوليودية

نيجي للأهم وهو السيناريو

السيناريو هوليودي بحت
اولا بالنسبة للبناء فهوا متقاس بالمسطرة
الدقيقة 10 “النداء”
Call
استاذه يكتشف فيه موهبة عظيمة فيفتحله الاوضة اللي خرجت اكتشافات العلماء العظماء ويديه الدافع الاكبر عشان يستمر ف مشواره العلمي

الدقيقة 27 بداية حبكة الفصل الاول
لما يقع على الارض ويكتشف ان عنده مرض ” داء العصبونات المحركة” وهيعيش بس لمدة سنتين
بعد منها بكام دقيقة في الدقايق التلاتين تبدأ رحلة البطل بالكامل رحلته مع ٣ حاجات: رحلته مع المرض ورحلته مع الحب ورحلته مع العلم والتحدي

الدقيقة 88 بداية حبكة الفصل الثاني لما يفقد حتى النطق والفقدان الاكبر لما هيبدأ يفقد زوجته لما تبدأ علاقة حب مع جوناثان موسيقار الكنيسة

وهيا دي الازمات الكبرى اللي هتوصل بعد كده للذروة

بالنسبة للقصة نفسها فهي برضو هوليودية
وطبعا عارفين ان الخلطة الهوليودية لا تخلو من التجارية ودي مكسبات الطعم والرائحة اللي هتجيبلها زباين
الفيلم برضو متقاس بالمسطرة على نفس نسق الافلام اللي بتتعمل عن العلماء او غالبية الافلام البيوجرافية وبشكل اعم تيمة التحدي

لو بس تكلمنا عن الافلام اللي عن العلماء نتذكر مثلا الفيلم الشهير عقل جميل بطولة راسل كرو او حتى فيلم لعبة المحاكاة بطولة بينيديكت كامبرباتش اللي تم انتاجه السنة اللي فاتتهنلاقي شخصية تعتبر حالة خاصة بتعاني من امراض معينة سواء جسمانية او نفسية وده طبعا بيكون بناء مقتبس من الواقع لكن ف بعض الاحيان بيزودوا الموضوع مثلا شخصية العالم جون ناش في فيلم عقل جميل بناءها النفسي زاد جدا عن الحقيقة ونفس الشيء في فيلم لعبة المحاكاة

لكن عموما التشابه بين الافلام دي في ان الفيلم عن حالة خاصة تكون طبيعية في بداية الفيلم وفي نفس الوقت تبدأ علاقة رومانسية بعدها تحصل الازمة للبطل فتستمر معاه حبيبته ف معاناته وهي نفسها تحصل لها ازمات نفسية منه فتضطر تسيبه في النهاية… بناء احداث واحد بنفس الترتيب. وده شيء كويس طبعا في الغالب وبيقدم معاني جميلة

الغريب جدا ان التشابه حتى في البسلة برضو ظهرت في اكتر من فيلم من نفس النوعية وفي حد من أبطال الفيلم بيشرح عليها نظرية معينة . تشابه طريف، طبعا انا حللت بس البناء الهوليودي المتشابه والمتقاس بالمسطرة

فيلم نظرية كل شيء ركز على جانب على حساب جانبين تانيين
ركز على الجانب الرومانسي والاجتماعي على حساب الجانب النفسي والعلمي لبطل الفيلم مع انه كان هيقدر يركز على اكتر من جانب نفسي في حياته. الجانب النفسي بالنسبة للمرض والجانب النفسي بالنسبة لنظريته للوجود وتعارضها مع وجود اله

فالمخرج اثر انه يعمل فيلم لايت تجاري خفيف هيقدر يكسب بيه حب كل المشاهدين لان المعروف ان اى مشاهد بيقدر يتقبل الجوانب الرومانسية والاجتماعي، لكن الجوانب النفسية والعلمية البحتة مش اى حد بيقدر يتقبلها وخاصة الجوانب دي اللي بتقدر ترفع الفيلم من الخانة التجارية للخانة الفنية

طبعا الفيلم فيه جوانب نفسية وعلمية لكن كانت بسيطة مش بتقل شخصية ستيفن هوكينج، الجانب النفسي ظهر بشكل اكبر في شخصية جين وايلد اللي ادت دورها فيليستي جونز

تحفظي الاكبر على الفيلم انه ما اظهرش سبب عظيم يخلي جين وايلد تسيب ستيفن وتتجوز جواناثان. الفيلم اظهرها في النهاية بملمح خيانة لستيفن مع جوناثان حتى قبل ما تنفصل عنه .. الانسانة اللي تحملت واحد كل ده مش هتسيبه بالسهولة دي !! وطبعا هيا في الواقع انفصلت عنه لكن لو في الواقع برضو انفصلت بنفس الشكل ده يبقى في شيء غلط حصل في الشخصية الحقيقة لجين وايلد.

السيناريو عموما ما فيهوش جديد وظهر بشكل هوليودي تجاري، لكن اجمل ما فيه هي تيمة التحدي العظيمة اللي تقدر تلهم اى مشاهد. الاخراج كان جميل وعمل حالة رائعة في الفيلم . وفي لقطتين عجبوني بشكل خاص وهما اللقطات اللي ستيفن عمل فيها ربط بين النار او بين فنجان الشاى بالحليب وربطهم .
بنظرياته اللي بيحاول يثبتها اللقطتين دول تم اخراجهم بشكل رائع.

والاعظم كان اداء ايدي ريدماين و اداء فيليستي جونز اللي هينافسوا بقوة على جوايز الاوسكار، والموسيقى العظيمة لـ يوهان يوهانسن المرشحة برضو للأوسكار. فيلم لايت ممتع وجميل لكن مش اسطوري